Grüessech mitenand

Obwohl ich 56 bin, han ich mit em Uuszug vo mine eigne Chind jetzt en komplette Neustart gwagt und bin jetzt is Gäu-Thal züglet. 

Wer wohnt au do und cha mir d' Region zeige? Wer hett Luscht für gmüetlichi und unzwungeni Träffe i de Nöchi? Sig es Brötle, Spieliobe, zäme Spaghetti choche, Kaffi und Chueche dehei, es Pläuderli uf em Balkon... .

Wer chunnt mit a Verastaltige i de Region? Wer spazifizottlet au gern gmüetlich i de schöne Natur do? 

Vielleicht finde mir sogar zumene Grüppli zäme. S' Alter spielt e kei Rolle, ich han nur ein grosse Wunsch und Bitt: Es wird ned im allerletschte Moment abgseit!! Das find ich sehr unhöflich und ned wertschätzend dr andere Person gegenüber. Ich bin sälber au zuverlässig und halte mir d'Zyt extra offe. Im Spontacts /GE wird das leider immer meh gmacht, drum schrieb ich das extra häre.

Ich freue mich uf direkti Nachrichte a mich oder wenn öpper en Alass im Gäu- Thal (und nur det!)  tuet do uusschriebe und organisiere, wo für alli gilt.

Liebi Grüess a alli Nanda